ชบาบ้านนา ชุมชนฅนกวี

ท้องทุ่งแห่งการแบ่งปัน

ข่าว:


ผญา ประวัติพระตาสร้างเมืองอุบล ตอนที่ 3. (อ่าน 1469 ครั้ง)

0 สมาชิก และ 1 บุคคลทั่วไป กำลังดูหัวข้อนี้

ฅนครบุรี

มากกว่า ออฟไลน์
  • *
  • Hero Member
  • กระทู้: 594
  • เพศ: ชาย
  • ฉันยังอยู่
    • www.chababaanna.com


   หลายวันได้หลายเดือนจึงคืนคอบ ฝูงเข้าเดินดงกว้างแสวงดั้นสร้างเมือง
เห็นทิศใต้เข้าเขตภูเวียง เป็นวงกลมแวดระวังคือต้ายคันว่าไปตั้งบ้านในห่อมภูเวียง
เห็นจักมีความสุขเผื่อเฮ็ดนาเฮื่อนย่าว อันหนึ่งเป็นสถานกว้างทำเลดีทุกเหยื่อง
เครื่องกินมีบ่ไฮ้ดงไม้มีสู่ด้านบ่เคืองแค้นสิ่งใด๋ ยูงยางไม้เป็นแถวถ่านต่ำ
เผิ่งและมิ่มมีแท้แทบง่ายาง บ่ห่อนอึดยากฮ้อนสระบวกวังปลา
บ่อาจพรรณนานับมากหลายเหลือล้น  
อันหนึ่งทางเที่ยวเข้าศึกโจรก็ยินยาก ทางสิตั้งต่อสู่กันไว้ก็สบาย
แห่งหนุ่งมีหนก้ามบูรพาตะวันออกนับแต่เฮาอยู่นี้ไปพุ้นห้าคืน  
คือว่าตามสายห้วยลำสงครามแม่น้ำใหญ่ หากมีนามแต่งตั้งปฐมเฒ่าเก่าโบราณ
ชื่อว่าผ้าขาวพรรณนาบ่อนเวินวังกว้าง อันที่ในลำน้ำศรีสงครามบ่อึดอยาก
ฝูงหมู่ปลาและกุ้งแลนเหี่ยเต่าสะกน มีทั้งดงสางช้างยูงยางป่าไม้ใหญ่
มีทั้งฝูงแฮดช้างคณาเนิ้ออยู่แฝง   มีทั้งดงผาเผิ่งกวางทรายหมูเถื่อน
บ่ได้ทุกข์ยากฮ้ายดงนั้นหยิ่งสบาย แหม่นว่าเฮาไปตั้งคาเมเป็นบ้านอยู่
เห็นจักเป็นที่หมั่นเมืองบ้านอยู่เกษม ข้าได้เลาะเลียบค้นแสวงหาหลายแห่ง
เห็นแต่สองบ่อนหั่นดีแท้กว่าสู่ทางข้าน้อแหล่ว

เมื่อนั้นพระตาได้ยินคำก็ชมชื่น จิตสะอื้นชื่นช่อยมะโนท้าวชอบใจ
จังได้ปรึกษาพร้อมประชุมกันตามสาเหตุ ไทเทศด้าวเห็นพร้อมพร่ำมวล
ตามที่นายพรานแจ้งแถลงความตั้งบ้านอยู่ แหม่นหมู่เฮาสามจุ้มก็มาได้บ่อนดีแท้น้อ
พระตาก็เหล่าปงอาจให้กับพวกหมู่นายกอง ตามขบวนของการตามที่เคยตุ้ม
ควรให้กองหลวงหน้าหลวงราชโภชนัย ไปผ้าขาวพรรณนาครอบครัวจนเกลี้ยง
จงรีบพากันตั้งคาเมเป็นบ้านอยู่ ตกแต่งสร้างเฮือนย่าวและไฮ่นา
ท้าวนามเตินกองหลังรีบล่วงไปอย่ารอช้า พากันเข้าภูเวียงตั้งบ้านอยู่
อย่าอยู่ช้ารีบแปลงสร้างไฮ่นา เตรียมเสบียงไว้ของกินอย่าให้ขาด
อย่าประมาทแท้ให้มีพร้อมสู่ประการ  บ่นานแท้ศึกเวียงสิมาฮอดเฮาแหล่ว
เฮาบ่ย้านสิตีต้อนแตกคืน ส่วนตูเฮานั้นกองกลางหมดทั้งหมู่
เฮาจักตั้งแต่งสร้างหนองบัวบ่อนเฮาอยู่นี่แหล่ว คันหากมีเหตุฮ้อนประการสิ่งใด
ให้รีบขับภาชีบอกเหตุการณ์อย่ารอช้า คันว่าจัดเสร็จแล้วก็พากันชมชื่น
ตื่นฮุ่งเช้าให้ตีฆ้องป่าวเตินกำชับซ้ำไทพวกกองครัว คนกองใด๋ก่าให้ไปกองนั้น

เหตุว่าคนสามจุ้มมาชุมกันเป็นหมวดหมู่ อยู่บ่อนหั่นพลตื้อส่วนสน อลหลเว้าเฮาฮาเสียงสนั่น
พร้อมว่านานสั่งแล้วบ่มีดื้อหลื่นความ เขาก็เดาดาห้างเดินทางย้ายย่าง
ไปสร้างบ้านตามเจ้าเผิ่นแต่งการ  เป็นสงสารแท้สาวฮามพวกผู้บ่าวเขา
หากเคยอยู่ยั้งโฮมพร้อมบ่อนเดียว ไผผู้สัปดลเว้าไทไกลพวกจุ้มอื่น
ให้มาเป็นมิ่งสู่ชายต้นห่วมสะนอน พวกนั้นคิดอั่งเอ้าแค้นอั่งในทรวง
คือดังนอนกองไฟอ่าวกระสันแดดิ้น เขาก็หลหวยฮ้อนในทรวงบ่ฮู้ส่วง
ฝูงหมู่สาวบ่าวให้นำกันอยู่ย้อยหยั่ง พุ้นสั่งพี้ พี้สั่งพุ้นน้ำตาย้อยสุ่มเลิง
บางผ่องปละปล่อยถิ่มทางหลังก้ามพ่อแม่ เลยหล่าไปห่วมชู้ทางหน้าบ่อาวหลัง
บางผ่องแซวๆฮ้องนำกันเอิ้นสั่งเสียงสั่งชู้บ่มีได้ขาดสาย
ลางคนไกลไปหน้ายังเหลียวหลังเอิ้นสั่ง ค่อยอยู่ดีเด้อชู้ต่างบ้านเสมอแตงกลางไฮ่เฮียมเอย
ปละน้องไว้ไปหน้าบ่หล่ำคอยละน้อ เวรสังเด่นำมาให้เฮียมห่วม
หนีพรากชู้ให้เหิรฮ้างห่างไกล หรือว่าเวรหลังเกี้ยวนำมาให้จำจาก.... อ่านต่อ









 

Sitemap 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 

Facebook Comments