ชบาบ้านนา ชุมชนฅนกวี

ท้องทุ่งแห่งการแบ่งปัน

ข่าว:


ผญา ประวัติพระตาสร้างเมืองอุบล ตอนที่ 5. (อ่าน 1616 ครั้ง)

0 สมาชิก และ 1 บุคคลทั่วไป กำลังดูหัวข้อนี้

ฅนครบุรี

มากกว่า ออฟไลน์
  • *
  • Hero Member
  • กระทู้: 594
  • เพศ: ชาย
  • ฉันยังอยู่
    • www.chababaanna.com
   


    บัดนี้ จักกล่าวเบื้องเวียงจันทร์อนุราช องค์กษัตริย์แจ่มเจ้ากรุงกว้างเก่าหลัง
ทรงทราบแจ้งระหัสเหตุมีมา  ว่าพระตาพระวอขบถควบคุมครัวต้อน
ขนครัวข้ามยามใด๋บ่ฮู้เมื่อ พระก็กิ้วโกรธเข้มเสียงสะท้านทั่วโฮง
โองการให้หาเสนาโดยรีบ คันว่ามาฮอดแล้วก็เตินให้เร่งพล
เมืองแสนพร้อมเมืองจันทร์ทั้งคู่ คุมไพร่น้อยประมาณได้ห้าหมื่นปลาย
ให้รีบติดตามฆ่าพระตานายหมู่ ลูกและเต้าเมียพร้อมอย่าให้เหลือ
แล้วจึงขับครัวต้อนคืนมาของเก่า  อย่าได้ตั้งอยู่ช้าการนี้ให้ด่วนไป
เมื่อนั้นเมืองแสนเจ้าเมืองจันทร์โดยอาจ ก้มกราบไหว้ยอน้องมอบธุลี
อาสาไท้ทวยทรภูวราชรับบทบาทสู้ตางเจ้าพระยอดเมือง
ค่อมว่ารับสั่งแล้วทูลบาทบังคม ออกมาเกณฑ์โยธาบ่ให้นานสามมื้อ
ฝูงหมู่ริพลเข้าไหลมาเมืองคับคั่ง ตั้งหากมืดอื้อตื้อประมาณได้ห้าหมื่นคน
เขาก็สน ๆ ย้ายถือปืนหอกดาบ ทั้งเสบียงไถ่ข้าวเคียนค้องรอบแอว
เมืองจันทร์เป็นกองหน้าพาริพลเดินด่วน  เมืองแสนให้อยู่ต้อนตามท้ายตรวจครัว
เขาก็เอากันข้ามนะทีหลวงของใหญ่ ตั้งแต่เช้าผองเท่าค่ำจวน
อิดอ่อนล้ากระหายหอบถือตัว มึนเมาหัวเกือบพอเพียงไข้
พร้อมว่าข้ามของแล้วฝูงไทข้าไพร่   เถิงฝั่งพื้นแคมน้ำจอดพล
กองทัพท้างสองเขือนอนอยู่ท่ง  แคมหนองคายบ่อนสร้างเมืองเดียวนี้

   เมื่อนั้นริพลก้ามพรรคพวกของพระตา ที่ให้คอยระวังศึกอยู่สอดแนมทางบ้าน
คือพระวอเจ้าแม่ทัพใหญ่นอนคอย  เห็นเลศนัยข่าวศึกนำฮอด
วางสายไว้ระวังเหตุมีมา   เป็นหูตาเที่ยวสอดแนมแดนด้าน
คันเห็นกองทัพเบื้องเวียงจันทร์ข้ามฟากมานั้น พระวอจึงได้นัดพี่น้องหนีซ่อนป่าดง
อย่าให้เขาส่องฮู้ระหัสเหตุภายเฮา อันว่าการภายในอย่าให้เขาเผยฮู้
วันนี้กองทัพเบื้องเวียงจันทร์เหน็ดเหนื่อย  เหตุว่าเดินเมื่อยล้าทั้งข้ามแม่นัทที
เขาบ่ฮู้เหตุเบื้องเฮาอยู่ทางใด๋  ทั้งสิพากันหลับเงียบเหงาทั้งค่าย
คันว่าดึกประมาณได้สามยามเป็นเขตให้สูจัดแจงหมั่นระวังไว้สูอัน
ฆ้อนและง้าวหลาวหอกปืนไฟ ธนูเหล็กไหลเครื่องรางเคียนหมั่น
คันว่าจัดเสร็จแล้วเดาดาคาดเครื่อง ตกแต่งต้งคอยพร้อมพร่ำมวล
แล้วเหล่าจัดชุดไว้ผูกมัดเคียนหัว เป็นเครื่องหมายสัญญาณบอกกันเพิงฮู้
คันได้ยินเสียงฆ้องทีเดียวอย่าได้ยาก ให้ลีบออกจากลี้มาพร้อมพาบกัน
แล้วจึงเอากันเข้าฟันแทงสับไขว่ อย่าได้ยั้่งอยู่ช้าตีต้อนให้แตกคืน
มันบ่ฮู้เหตุเบื้องสดุ้งตื่นตกใจ บ่อาจจับอาวุธตอบคืนเฮาได้
พร้อมว่านายสั่งแล้วก็ย้ายแยกกันไป จัดให้เป็นกองแนมอยู่ดอนดงกว้าง
เถิงเมื่อยามสามได้พอดีเป็นฤกษ์พระวอจีงเอาฆ้อนฟาดฆ้องเสียงก้องสนั่นไพร
ฝูงหมู่ทหารกล้าคนดีลี้สุ่ม คันยินหยู่ง ๆฆ้องใจห่าวยิ่งกว่าเสือ
เขาก็สน ๆเต้นชวนกันออกไล่ จากพุ้มไม้สถานลี้แห่งตน
แล้วจึงโฮมกันเข้าสถานเพียงทุ่งใหญ่ เขาก็จัดแจงพร้อมตามเจ้าแต่งการ
คันว่าพร้อมพาบถ้วนฝูงพลลี้สุ่ม พระวอแม่ทัพหลวงสั่งการบ่มีช้า....



 

Sitemap 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 

Facebook Comments